नारायणगढ-मुग्लिन सडक एकतर्फी सञ्चालन

नारायणगढ-मुग्लिन सडक एकतर्फी सञ्चालन

३० असार, चितवन। नारायणगढ–मुग्लिन सडकखण्डको १७ किलोमा गएराति सडक थप भासिएपछि सवारी एकतर्फी भएको छ। सो ठाउँमा हिजो बिहान ग्राबेल हालेर सडक सञ्चालनमा ल्याइएको भए पनि पुनः भासिएसँगै त्यस ठाउँमा सवारी सञ्चालनमा रोक लगाइएको हो।

डिभिजन सडक कार्यालय भरतपुरका प्रमुख ईञ्जिनियर कृष्णराज अधिकारीका अनुसार यसअघि सो ठाउँमा थप धसिएपछि खतरा बढेकाले सवारी सञ्चालन रोकिएको हो। उनले हिजो बिहान यसअघि धसिएको ठाउँमा थप धसिएपछि ग्राबेल हालेर सवारी सञ्चालनमा ल्याइएको जानकारी दिए। सडक धसिने क्रम थपिएपछि सडकमा ड्रम राखेर एकतर्फी बनाइएको उनले बताए।

सडकखण्डको १७ र २६ किलो भन्ने स्थानमा सडक विस्तार गरेको एक वर्ष नपुग्दै धसिएको थियो। अधिकारीका अनुसार १७ किलोमा तीनदेखि तीन दशमलव पाँच मिटर फराकिलो ३५ मिटर लामो क्षेत्रमा एक फिटभन्दा बढी सडक धसिएको छ। सो ठाउँमा सडक नौ मिटर फराकिलो छ। त्यसै ठाउँमा २०६० मा सडकमुनिबाट एङ्कर पर्खाल दिएर निर्माण गरिएको थियो। त्यसैमा समस्या आएको जनाइएको छ।

उक्त क्षेत्रमा तलबाट त्रिशूली नदीले काटेका कारण एङ्कर पर्खालले काम गर्न छाडेको हो। दुई वर्षअघि उक्त सडक विस्तारको काम गरिएको हो। सडक निर्माण गरिएको एक वर्ष नपुग्दै सो ठाउँ र २६ किलोमा ६ दशमलव पाँच मिटर फराकिलो सडक ७० मिटर लामो भाग धसिएको छ। ती दुवै ठाउँमा मर्मतका लागि बोलपत्र आह्वान गरिएको भए पनि बोलपत्र नपरेको सडक विभागले जनाएको छ।

अधिकारीले धसिएको ठाउँ बढ्दै गएमा थप जोखिम हुने बताए। भित्तापट्टि अग्लो पहाड भएकाले विस्तार गर्न कठिन छ। अविरल वर्षा भइरहेकाले उक्त सडकको ठाउँठाउँमा पहिरो खस्ने र पन्छाउने काम जारी नै रहेको उनले बताए। सडक राजधानी काठमाडौं भित्रने र बाहिरिने प्रमुख मार्ग हो।

Loading
TOP